الأربعاء، 28 سبتمبر 2011

الكتاكيت الصغيرين



ايام ما بنكون فى اولى كليه بتبقى الحياة لونها بمبى بكل ما فيها

و الواحد بيبقى عنده شوال تفاؤل كده متعرفوش جبته منين

وده اللى حصل

قولت انا كبرت وزى ما الواحد كان فيه اخوات بيعلموة الدين فى المسجد ويحببوة فيه

وانا اكتر ناس بحبهم همه المعلمات اللى كانوا معايا فى المسجد

اتعلمت منهم حاجات كتير

ولغايه دلوقتى فاكراهم بالاسم

وبدعيلهم علطول

فقطقت فى راسى فكرة  حالمه

انى ادى زهرات فى المسجد

طبعا الزهرات اللى وصفتهلكم فى الرابط ده 

وعلشان كنت مبتداة

مسكونى اصغر سن

من 4 الى 6 سنين

اول ما عرفت الخبر

كنت طايرة من الفرحه

لانى بمووووووت فى العيال الصغيرة

وقعدت احلم باللحظه اللى هدخل فيها الفصل

والاقيهم يا عينى عليهم قاعدين محترمين فى اماكنهم

واقرا الايات وهما يرددوا ورايا بصوتهم الملائكى

و بكلامهم المكسر اللى يخلي الواحد ياكلهم اكل

ولبسهم الجميل

و لا وهما بيقولو حاضر يا مس

 يااااااااااااااااااااااه

وقعدت احلم واحلم

ومتشوقه على الاخر انى ابتدى

وجاء اليوم

تيرارااااااااااارا

اخذتنى المشرفه الى غرفة الاحلام

قصدى الاعدام

لاجد اجمل مخلوقات الارض

مبهدلين هدومهم




اشى شيكولاته

اشى مصاصه

ملزقه بقهم

اشى عصير واقع على الهدوم

ده غير الهدوم اللى كان شكها ماساوى فعلا

وعليها كمية قذارة

تخلى الواحد يبص للحيطه احسن

طيب خلاص

نحاول نبص لنص الكوبايه المليان

يلا يا حلوين اقعدوا كويس علشان نقرا قران

علشان ربنا يحبنا

يا عسل اقدى يلا

بنت فى الرابعه تقف فوق الديسك و تبص من الشباك وعماله تلعب ولا هيه هنه

اتنين فى اخر الفصل قاعدين يتخانقوا على القلم الرصاص

اتنين فى تانى ديسك قاعدين يلعبوا سبت حد

بنت قاعده تعيط قدام

بنت خارجه من الفصل رايحه فين يا حلوة ؟

كشرت عن انيابها وقالت : اشرب

اتخضيت انا وقولتلها اتفضلى يا حبيبتى

تلاته لاقوا نفسهم زهقوا من الحصه وقرروا يروحوا البيت من قبل حتى ما نبتدى نعمل حاجه

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

what could i do ?

فجاه لقيتنى محتاسه ومش عارفه اعمل حاجه 

وبفكر فى حاجه واحده بس 

الهروب 

انا اللى جبت ده كله لنفسى 

اتارى هبه وهيه بتوصلنى للفصل قالتلى 

عيشى يا أسماء 

حل بسرعه 

انت اتحطيتى فى الوضع ولازم تتصرفى يا اسماء 

اعمل ايه ؟

اعمل ايه ؟

رحت قايلالهم 

مين يلعب معايا ؟

انتبه حبه و سكتوا 

والباقى قعدوا يعملوا اللى بيعملوة ومش هوصفه تانى علشان الزهق 

طيب والحل 

يلا يا عسل انتى اسمك ايه 

هبه 

وانتى 

سايه 

ايه 

سايه 

قصدها سارة يعنى 

وانتى يا سكرة 

بثنت 

قصدك بسنت اوك 

طيب لا 

اقفوا على السبورة صف واحد 

وقفوا 

نفسى اعرف ليه الحاجه الوحيده اللى بيسمع العيال فيها الكلام اللعب 

يلا 

بصوا لما اقول الله اكبر تقفوا 

ولما اقول ولله الحمد تقعدوا 

عملتها معاهم اول مرة 

وهما كملوا 

اذكياء جدا ماشاء الله 

تانى مرة زمايلهم بصوا 

الله اكبر 

ولله الحمد 

زمايلهم انضموا 

هه 

تيجوا نلعب لعبه تانيه 

اه يا مس 

العبهم ايه دول 

اه ايه رايكوا نلعب القائد يقول 

فهمتهم اللعبه 

تمام 

قعدنا نلعب ييجى ساعه 

من غير ما يتخانقوا 

طيب ايه رايكوا احكيلكوا حكايه حلوة اوى 

ماشى يا مس 

يلا نبتدى 

كان يا ماكان 

كان فيه فيل كبير قد كده 

ورسمتلهم فيل على السبورة 

وحكيتلهم قصه اصحاب الفيل بصورة مبسطه 

وانتهى الوقت 

انتهى الوقت 

ايه 

مش مصدقه 

انا هروح بيتنا تانى 

واو 

احمدك يا رب 

لكن للاسف 

بكرة فى نفس المعاد 

عندى لقاء جديد 

مع فيلم الرعب المزعج 

الوحوش الصغيرة 

زهراتى الجدد 

ليك يا رب 

بس لو عايزين الحق 

كنت مبسوطه جدا برده

شكلى مبحرمش











الأحد، 25 سبتمبر 2011

شوية خواطر عن تربيه العيال




يلا شوية خواطر عن تربيه العيال 



طبعا الخواطر ديه ممكن لا تعدو كونها ملاحظات شخصيه 

ولا ترقى لمستوى التعميمات 

بحكم المهنه بشوف كل انواع الاطفال تقريبا 

من اول المنطوى والخجول للشقى اللى عايز الضرب بالنار 

معلومه حقيقيه : الطفل بيكتسب اهم صفاته اللى بتاثر على حياته فى اول ست سنين من عمرة 

يعنى لو الابهات والامهات انتبهوا اوى انهم يعلموا ابنهم الحاجات اللى بيتمنوا انهم يلاقوها فيه فى اول ست سنين

هيطلعوا عيال متربيه كويس اوى وزى الفل كمان 

تحليل بسيط 

اغلب العيال اللى كانوا بيجوا بالضرب وبس يعنى مينفعش معاهم انا هزعل منك او او الكلام ده 

بيكون الاب او الام عنيف اوى معاهم من الصغر 

يعنى متعود يضربه 

من وهوة عندة تلات سبين او اربعه 

على فكرة اطفال زى كده لما بيكبروا بيكون شكلهم انطوائى فى التعامل مع الناس من برة 

لكن لما بيتمكنوا او بيتحكموا بيضربوا 

ومن ضمنهم الرجاله اللى بتضرب زوجاتها 

وبيكون سلوكهم دائما عدوانى بس من تحت لتحت 

يعنى زى ما اتعودوا وهما صغيرين  من ورا بابا وماما 

ملحوظه :  نحاول دايما واحنا بنربى عيالنا ان الضرب ده لما يعمل مصيبه سودا 

وطبعا كسر كوبايه او توقيع العصير او بهدله الشقه بالالعاب ديه مش مصايب سودا 

ولا ترقى لانها تكون مصايب حتى بس

لكن فيه مصيبه سودا الامهات مش بياخدوا بالهم منها بالعكس لما بيعملها الطفل بيضحكوا 

ان الطفل يضرب والدة او والدته او يتف عليهم 

او يشتمهم 

طبعا الام بتفرح اوى لما بتشوف ابنها البيبى اللى لسه متمش سنتين بيضربها 

وطبعا الضربه مش بتوجعها 

او مثلا يكون سمع جدو او نينه او حتى بابا او مابا بيقول يا كلب مثلا 

فيجى الطفل يقول لمامته بلغته الطفوليه او لباباه يا كب 

انا معاكوا انكوا بتفرحوا اوى لما بتسمعوا صوته او تشوفوا حركته 

و خصوصا لما تكون الحاجه ديه هوة لسه متعلمها جديد 

لكن ماحوظه : معنى انكوا تضحكوا او حتى تبتسموا او تبالغوا فى الفرحه بانكوا تبوسوة 

بيخلى مبدا احترام الكبير و الادب فى التعامل مع الاكبر منه 

مش يختل بس 

لكن ينهار 

والطفل ده لما بيكبر بتبقى معغاملته سيئه جدا مع الاكبر منه 

علاج المشكله العويصه ديه 

حاجه بسيطه جدا 

انك اول لما يعمل ابنك كده ولاول مرة 

تبصيله بنظرة غضب على زعل 

و تسيبيه و تبعدى عنه 

هيجرى عليكى ويحاول يصالحك مش تصالحيه بسهوله وتحاولى تفهميه باسلوب يفهمه وبجديه ومن غير هزار 

ان اللى عمله ده غلط اوى و مينفعش يعمله مع حد اكبر منه 

الحركه ديه هتعلمه ان كده عيب اوى و مش هيقدر يعملها تانى 

وبكده ابنك يحترمك طووووول عمرة 

على فكرة التربيه ممكن نتخيل انها حاجه صعبه جدا 

وهيه بتبقى كده بالفعل لو الام من نوعيه انا بتجوز علشان كل الناس بيتجوزوا 

وهخلف علشان الناس ميقولوش عليه حاجه 

متهيالى انك لو ناويه تبقى ام 

يبقى لازم تتعلمى اواى تربى عيالك 

قبل ما تخلفيهم 

لان سلوكيات بسيطه اوى فى تعاملك معاهم 

اما تطلعهم عباقرة و علماء و اخلاقهم من احسن ما يكون 

واما تطلعيهم كوابيس تسير على ارجل


اول يوم تربية عملى (1)




اول يوم فى التربيه العملى

باعتبار ان انا بقيت فى سنه تالته

(ياة العمر عدى بسرعه يلا حسن الختام )

ففى كلية التربيه المحترمه بتاعتنا بننزل تدريب عملى ..........

.احم ...احم وما ادراكم ما التدريب العملى وخصوصا الاعدادى

عسسسسسسسسسسسسسسسسسسسسسل

المهم قبل التربيه العملى ما تبدا كنت لازم اخد التوصيات

وبسؤال الاحبة اتفقت جميع الناصحات انى لازم اخذ خرزانه

وافضل مكشرة (اعملى شخصيه يعنى )علشان العيال مش تاخد عليه

وابتدا سيل النصائح

1- اوعى يا اسماء تهزرى مع العيال او حتى تبتسمى قدامهم هيقرفوك

2- اهم حاجه دفتر التحضير اشتريلك حبه الوان اخضر على احمر على برتقالى

على بنفسجى واعملى شغل ويا سلام لو حبة استيكرات ظبطى دفترك كده علشان

الموجه (كائن الموجه ده جاى من كى جى تو )المهم الالوان

وسيبك من التحضير اهو اى كلمتين والسلام وهتعدى

3- اياك تدخلى الفصل من غير عصايه العيال هيستهتروا بيك ومش هيحترموك

4- ظبطى المدرسة اللى معاك اشى طرحه محترمه على برفان مميز

وكده علشان تكتب فيك تقرير حلو

5- اول ما تدخلى الفصل بصى للعيال نوعين من النظرات الاولى بقرف

والتانيه بتكشيرة

6- اصلا انتى مش نافعه فى التدريس

وهتجيبينا ورا بس اهو ننصحك والسلام


طبعا انهالت على النصائح واغلبها كان من الشكل ده

وطبعا انا مدركه تماما لصورة وضعتها بيدى امام ناس معينه

عندى لاسباب معينه ايضا وهى انى منفعش فى حاجه

(ديه الصورة مش الاسباب )


وجاء اليوم

اول يوم ننزل فيه التربيه العملى

وبينى وبينكم حطيت كل النصايح ديه فى دماغى

وتاثيرها كان كبير جدا لسبب بسيط

انها جايه من اكتر من واحد ده غير ان مدرسه الفصل

قالتلى نفس الكلام قبل ما ادخل

بس يا خسارة مجبتش العصايه اهىء اهىء وايه العمل؟؟؟؟

ندخل على النصيحه التانيه التكشيرة

دخلت الفصل وانا عابسه (مكشرة يعنى )

ولا انطق لان اليوم ده المدرسه اللى معانا هيه اللى بتشرح

وجلست فى اخر الفصل لان انا وجهى بيبتسم لوحدة

فعلشان احافظ على التكشيرة فضلت مركزة جدا



بعد انتهاء الحصه خرجنا والبنات اصحابى كلهم تعجب

اسماء عرفت تكشر اخيرا وواحدة صاحبتى

قالتلى : تصدقى بتعرفى تكشرى زينا

قولتلها :علشان تعرفى انا انا لما بكون عايزة اعمل حاجه بعملها

ولكن انا طبعا بعد الحصه اخدت نفسى ورجعت لطبيعتى تانى

وعدى اول يوم

وجه دورى فى الشرح

طبعا اغلب النصائح تجاهلتها لما نظرت اليها نظرة عقلانيه

وكان يوم .....

بس ده المرة الجايه

الخميس، 22 سبتمبر 2011

افتتاحية





احترت كتير فى اسم للمدونه 

وفكرت فى اسامى زى 

اللى مربهوش امه وابوة ربنا يرزقوة بعيال يربوة 

طويل اوى مش كده 

اسم تانى زى 

مقالب العيال 

بس انا مش هتكلم عن مقالب العيال وبس 

عيال انفيلوب 

بس انفيلوب يعنى جواب ايه اللى دخل العيال فالموضوع ده 

المهم 

ابا بكرة اختيار الاسامى علشان كده 

ندخل فى حاجه تانيه 

المدونه ديه هتبقى مدونه ساخرة 

موضيعها هحاول تكون فكاهيه 

فمحتارة اخليها مقالات ولا قصص قصيرة 

الى الناس بتحبه اكتر 

اللى هوة ايه ؟

طب سيبكوا من ديه كمان ندخل عالموضوع طوالى 

كنت قاعده مع نفسى كده ففكرت فى زمانى الماضى 

واستحضرت شريط الحياة

ياااااااة ده الواحد عاش كتير اوى 

ابتدائى خمس سنين 

اعدادى 3

ثانوى 3 

بس ده كله كوم واللى حصل من بداية دخولى الجامعه غيرررررررررر

ساعه لما بدات انى ادخل مجال الزهرات 

يعنى ايه 

فى الاجازة بدل ما نقعد فى البيت احنا والعيال 

بنعمل حاجه ظريفه 

درس فالمسجد 

او جمعيه خيريه مثلا 

نحفظ فيه البنات قران 

ونعلمهم حبه حاجات دينيه 

اخلاق 

قصص الانبياء 

عقيدة 

فقه 

وتنمية بشريه بس ده مش كتير 

و العاب علشان مش يحسوا بالملل من قعده المسجد 

طب مين هم الزهرات ؟

هما البنات من سن 4 الى 15 

ومقولكوش عليهم 

وحشية ايه ؟

قصدى 

براءة ايه

عيال تخليك  هتموووووووووووت و ترميهم من الشباك 

قصدى 

تبوسهم و تطبطب عليهم بمنتهى الرقه 

ومع الزهرات 

الهدف الاساسى 

انك تحاول تستحمل هذه الكائنات .......... قصدى الملايكه الصغيرين 

وتحببهم فى المسجد 

مش بس كده 

ممنوع الزعيق 

ممنوع النرفزة 

ممنوع الضرب اكيد 

ممنوع التكشيرة الا فى حالات الانفلات الامنى الشديد 

ممنوع التعب 

ممنوع ان راسك تصدع 

ممنوع انك تزهق من ترديد الايات اكتر من خمس مرات مثلا

او تفكر مجرد تفكير انك تمل 

لانك لو مليت مش هتلاقى حد حافظ الحصه الى بعديها 

طبعا كل القوانين ديه انا اللى وضعتها لنفسى 

فيه اكيد مدرسات للزهرات بيضربوا وبيشتموا وهيه مرة واحده اللى بنقول فيها الايه ومفيش العاب وكده 

بس الهدف مش اننا ندى وخلاص 

الهدف ان ملائكة العذاب دول قصدى ملائكة الرحمة دول نعلمهم كل الحاجات الحلوة 


علشان لما يكبروا وتشوف تعاملهم مع الناس تفرح اوى 

وعلشان دول اساس الاصلاح 

لو متدايقين من حال الشباب فبلدنا 

يبقى الحل اننا نربى من البدايه صح 

المهم 

اثناء رحلتى الطويله والممتدة حتى الان بفعل المهنه 

كان فيه مواقف مضحكه كتيرررررررررررة اوى 

فالفكرة عماله تزقزق فى نافوخى من ايام 

انى اعمل مدونه للتجربة ديه 

اهو الواحد يرجعلها لما يكون متدايق ولا حاجه 

وفنفس الوقت التربيه حاجه عمليه اوى 

غير النظريات خالص 

فكل شويه الواحد بيتعلم حاجه من العيال 

تفيدة برده 

كفايه كده النهاردة